Vegna mikillar aðsóknar á Ævintýri Múnkhásens sem hefur verið kölluð

"Besta sýningin á stórhöfuðborgarsvæðinu"  ^{JVJ DV}

"hápunkturinn á óvenju viðburðaríkum leikhúsvetri fjölskyldunnar"  ^{AA Spássían}

hefur verið ákveðið að bæta við aukasýningum

sunnudaginn 20 maí kl 17.00 og á fimmtudaginn 31. maí kl 18.00.

Sýningin 31 maí er við opnun "Bjartra Daga"

árlegrar menningarhátiðar Hafnfirðinga.

               Miðapantanir í síma 565 5900

                Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. og á midi.is

Þann 22. mars frumsýndi Gaflaraleikhúsið ÆVINTÝRI MÚNKHÁSENS sem er nýtt íslenskt leikverk með söngvum frá fólkinu sem færði okkur Töfraflautu Mozarts í Hörpunni og Grímuverðlaunaverkin Klaufa og Kóngsdætur og Bólu Hjálmar. Verkið er  byggt á ótrúlegum ýkjusögum þekktasta lygara heimsins, þýska barónsins Múnkhásen (eða Karl Friedrich Hieronymus, Freiherr von Münchhausen).

Þegar Múnkhásen sneri heim úr hernum, eftir bardaga í Rússlandi og Tyrklandi, sagði hann ótrúlega skrautlegar og krassandi lygasögur af ævintýrum sínum, þar sem hann átti meðal annars að hafa setið á fljúgandi fallbyssukúlum, ferðast til tunglsins upp baunagras, hrapað inn að miðju jarðar, bjargast úr díki með því að draga sjálfan sig og hestinn með upp á hárinu, snúið úlfi á rönguna, riðið framparti af sundurskornum hesti og unnið ótal önnur ómannleg afrek í bardögum, veiðiferðum og einkalífi.

Aðstandendur sýningarinnar eiga að baki fjölþætta reynslu úr leikhúsi, sjónvarpi, kvikmyndum og tónlist. Sævar Sigurgeirsson skrifar handritið og Ágústa Skúladóttir leikstýrir. Tvö leikstjórnarverk Ágústu þar sem Sævar var meðal höfunda hafa unnið til Grímuverðlauna sem besta barnasýningin: Klaufar og kóngsdætur í Þjóðleikhúsinu 2005 og Bólu-Hjálmar hjá Stoppleikhópnum 2009.

Aðrar sýningar Ágústu, bæði í Þjóðleikhúsinu og með fjölda atvinnu- og áhugahópa hérlendis og erlendis, hafa jafnan vakið mikla athygli. Hún hefur einnig sett upp nokkrar óperur, nú nýlega hina stórglæsilegu opnunarsýningu Hörpunnar á Töfraflautunni.

Sævar var jafnframt einn af höfundum þriggja síðustu Áramótaskaupa RÚV, en leikstjóri þeirra, Gunnar Björn Guðmundsson (sem einnig leikstýrði kvikmyndunum Astrópíu og Gauragangi) stígur nú á leiksvið aftur eftir nokkurt hlé. Með honum á sviðinu verða stórleikarinn, sjónvarpsstjarnan, barnaefnismaskínan og veiðiklóin Gunnar Helgason, sem vart þarf að kynna; Ágústa Eva Erlendsdóttir, sem slegið hefur í gegn í kvikmyndum á borð við Mýrina og Borgríki, Áramótaskaupinu 2010 og sem söngstirnið og ólíkindatólið Sylvía Nótt; Magnús Guðmundsson sem meðal annars hlaut Grímutilefningu fyrir leik sinn í Fool 4 love hjá Silfurtunglinu 2008,skaupstjörnurnar Huld Óskarsdóttir og Gríma Kristjánsdóttir og stórsöngkonan Sara Blandon.

Tónlistina semja Ármann Guðmundsson, Þorgeir Tryggvason og Eggert Hilmarsson, en þeir eru allir meðlimir í Ljótu hálfvitunum (ásamt Sævari) og leikmynd gerir Axel Hallkell Jóhannesson, en hann á að baki langan og farsælan feril sem leikmyndahönnuður hjá Þjóðleikhúsinu, Borgarleikhúsinu, Íslensku óperunni og víðar.

Ævintýri Múnkhásens er lygileg sýning fyrir alla aldurshópa, full af ólíkindum, glensi og töfrum leikhússins.

Frumsýning var  22.mars kl. 18.00, Nánar um sýningardaga hér.